Мэдээлэл

Эгийн голын УЦС-ынХАН ТЭЦ-4 СТАНЦТАЙ ТАНИЛЦЛАА

Монгол Улсын эрчим хүчний гол хэрэглээг 4-р Цахилгаан станц хангадаг. Эгийн голын УЦС төслийн нэгжийнхэн энэ станцтай танилцаж уулзалт хийлээ. Монгол Улсын эрчим хүчний хэрэглээ огцом нэмэгдэж байгаа энэ үед станц хүчин чадлынхаа дээд ачааллаар ажиллаж байна. Оргил ачааллын үед ОХУ-с авдаг цахилгаан эрчим хүчний хэмжээ жил бүр нэмэгдэж байна. Эгийн голын УЦС ашиглалтад орсон тохиолдолд нийт цахилгаан эрчим хүчний горимын тохируулга хийгдэх боломжтой болж станцын ачаалал хөнгөрч, шөнийн цагт цахилгааны илүүдэл гарах нь багасаж ашигтай ажиллагаа нэмэгдэх талаар уг станцынхан ярьж байна. Төвийн эрчим хүчний системд хамтран ажиллах шаардлагатай хоёр станцынхны уулзалт ажил хэрэгч болж ТЭЦ-4 станцтай танилцаж улмаар олон жил хамтран ажиллах хоёр станцын үйл ажиллагааны эхлэлийг тавилаа.

ТӨСЛИЙН УДИРДАХ ХОРООНЫ ХУРАЛ БОЛЛОО

Эгийн голын УЦС төслийн нэгжийн Төслийн удирдах хорооны хурал боллоо. Хуралд төслийн нэгжийн хийсэн ажлын танилцуулга мөн энэ онд хийгдэх замын болон цахилгаан дамжуулах агаарын шугам, Археологи, Байгаль орчин, загасны судалгаа хийх багуудыг танилцуулав. Зөвлөх компаниар ажиллах санал ирүүлсэн гадаадын компаниудын талаар танилцуулж төслийн шаардлагыг хангасан Санхүү, Инженер техник, Байгаль орчны Ерөнхий зөвлөх болон хуулийн зөвлөх компаниудыг шалгаруулав. Мөн төслийн Аудитроор ажиллах компанийг сонгож авто зам, гүүр, цахилгаан дамжуулах агаарын шугам, дэд станцын зураг төсөл боловсруулах, судалгаа хийх дотоодын 7 компанийг шалгарууллаа. Төслийн удирдах хороо уг компаниудын талаар танилцаж ярилцсаны үндсэн дээр шаардлага нөхцлийг хангасан компаниудыг шалгаруулав. Төслийн удирдах хорооноос төслийн нэгжийг зөвлөх компанийн сонгон шалгаруулалтын танилцуулга судалгаа сайн хийж үндэслэлтэй санал оруулсаныг сайшаалаа.

СЭРГЭЭГДЭХ ЭРЧИМ ХҮЧНИЙ ЧИГЛЭЛЭЭР ХАМТРАН АЖИЛЛАХ ХҮСЭЛТЭЭ ИЛЭРХИЙЛЭВ

Эрчим хүчний яамны Төрийн нарийн бичгийн дарга Д.Дэлгэрцогт Бүгд Найрамдах Чех Улсын Сенатын гишүүн, Европын холбооны дэд дарга Ярослав Добрава тэргүүтэй Чехийн төлөөлөгчдийг хүлээн авч уулзлаа. Сенатын гишүүн Ярослав Добравагийн хамт Чех-Зүүн Азийн худалдааны танхимын ерөнхийлөгч Милан Клеска оролцов. Чехийн төлөөлөгчид Сэргээгдэх эрчим хүчний чиглэлээр хамтран ажиллах сонирхолтой байгаагаа уулзалтын үеэр илэрхийлж нар, салхи, усны бүхий л эх үүсвэрийг барьж байгуулах боломж, туршлага тус улсын компаниудад байгааг онцлов. Мөн Эгийн голын УЦС-ын төсөлд оролцохоор санал өгч байсан туршлагатайгаа хэлээд уг төсөлд хөрөнгө оруулах хүсэлтэй байгаа гэлээ. Төрийн нарийн бичгийн дарга Д.Дэлгэрцогт тус улстай эрчим хүчний салбарт хамтран ажиллаж буй төслүүдийг дурьдаад Монгол Улсад суугаа Элчин сайд хатагтай Ивана Гороллова Эрчим хүчний сайд М.Сономпилтэй хэдхэн хоногийн өмнө уулзаж Эрдэнэтийн ДЦС-ын шинэчлэлийн ажлын Техник, Эдийн засгийн үндэслэл (ТЭЗҮ)-ийг боловсруулж буй асуудлаар ярилцсанаа тэмдэглээд энэхүү салбарт цаашдын хамтын ажиллагаа нээлттэй бөгөөд Орхон аймагт усан цэнэгт цахилгаан станц барьж байгуулахад БНЧЦ-ын компаниуд оролцож болохыг хэллээ.

ЗАСАГ ДАРГА ЭРТНИЙ ОЛДВОРОО НЭХЭВ

Булган аймгийн Хутаг-Өндөр сумын Засаг дарга Д. Жаргалсайхан тун нэхэл хатуу нэгэн. Өөрийн сумын нутгаас олдсон эртний дайчны 2 хүрэл дуулгыг хайсны эцэст олж өөрийн нүдээр харсан байна. Тус сумын нутгаас олдсон хүннүгийн үеийн булшнаас гарсан дуулганы материал нь одоогийн эрдэнэтийн зэстэй адилхан мөн 2 мм ийн зузаан уран хийцтэй ид насны хүнд багтахаар хийгдсэн нь монголчууд эрт үед чулуунаас металл гарган ахуйн хэрэглээнд ашиглаж технологийн өндөр түвшинд боловсруулж чаддаг байсныг илтгэнэ. Өдөр тутмын сонинд уг дуулгануудыг Франц улсад гарган 8000 ам доллараар зарсан гэсэн мэдээлэл гарснаар эхэлсэн эрэл Эгийн голын УЦС-ын төслийн нэгжийнхэнтэй холбогдож туслалцаа хүссэнээр төслийн нэгжийн зөвлөх доктор Д.Эрдэнэбаатартай уулзаж эрлээ олж сэтгэл хангалуун нутаг буцлаа. Доктор профессор Д.Эрдэнэбаатар Эгийн голын сав газар судалгаа хийж уг дуулгануудыг олсон хүн юм. Үнэ цэнэтэй эртний энэ олдворууд нь ШУА–н Археологийн хүрээлэнд хадгалагдаж байна.

БУЛГАН АЙМАГТ АЖИЛЛАА

Төслийн нэгжийн захирал Д.Одхүү ахалсан ажлын хэсэг Булган аймагт ажиллаа. Булган аймгийн Засаг даргын тамгын газар, иргэдийн Төлөөлөгчдийн Хурлын ажилтнуудад төслийн үйл ажиллагаа, явцыг танилцуулж, цаашид аймаг орон нутагтай хамтран ажиллах төлөвлөгөө боловсруулав. Булган аймгийн ард иргэд Монгол Улсын анхны том оврын усан цахилгаан станц нутаг дэвсгэрт нь баригдах болсонд талархал илэрхийлж байсан бөгөөд аймгийн удирдлагын зүгээс төслийн ажлыг бүх талаар дэмжиж ажиллана гэлээ. Аймгийн Засаг дарга Д.Эрдэнэбатаар ахлуулсан ажлын хэсэг байгуулах нь зүйтэй гэж үзэж, энэ ажлын хэсгээс аймаг орон нутагт хийх ажлын талаар ярилцлаа. Энэ ажлын хэсэгт Булган аймгаас гадна, Орхон аймгийн ЗДТГ-н холбогдох ажилтнууд болон төслийн нэгжийн дэд захирал Байгаль орчин олон нийттэй харилцах албаны дарга нар ажиллахаар боллоо. Мөн төслийн багийнхан Эг-Сэлэнгийн бэлчирт очиж Эрдэнэт хотоос төслийн талбар хүрэх авто зам болон цахилгаан дамжуулах агаарын шугамын трассыг дахин судалж нягтлах ажил хийлээ.

АЖЛЫН УУЛЗАЛТ БОЛЛОО

Эрчим хүчний яам, Байгаль орчин ногоон хөгжлийн яам, Эдийн засгийн хөгжлийн яам, Хөгжлийн банкны холбогдох хүмүүс Эгийн голын УЦС төслийн нэгжтэй танилцлаа. Төслийн нэгжийн захирал Д.Одхүү төслийн явц, үйл ажиллагааны чиглэл, хийж байгаа болон ойрын үед хийх ажлуудыг танилцуулав. Хамтран ажиллаж буй байгууллагуудын хоорондын ажил хэргийн уулзалт хийх, мэдээлэл солилцох нь цаашдын үйл ажиллагаа, хамтарсан зорилтоо биелүүлэхэд тус нэмэр болох юм.

ЭГИЙН ГОЛД АЖИЛЛАВ

Монгол Улсад том оврын усан цахилгаан станц анх удаа барьж байгаатай холбогдуулан төслийн талбарт ус зүй, Байгаль орчин, цаг уурын болон бусад судалгаа тасралтгүй үргэлжлэн хийгдэж байна. Өвлийн усны горимыг судлах ажлын хүрээнд Эгийн голын УЦС төслийн нэгжийн ажлын хэсгийнхэн Эг сэлэнгийн бэлчирт ажиллаа. Усны түвшин, мөсний зузаан, станц барих газраас 2.5 км газрын хэвгийн өөрчлөлт зэргийн хэмжилтийг 4 цэгт хийв. Усан цахилгаан станцын барилгын ажлыг оновчтой зохион байгуулах, зам харилцааны схемийг өнөөгийн нөхцөлтөй уялдуулах чиглэлээр судалгаа хийлээ.

ОЮУТНУУДЫН АНХААРЛЫГ ТАТЖЭЭ

Эгийн голын УЦС төсөл Шинжлэх ухаан Технологийн их сургуулийн оюутан багш нарын анхаарлыг татжээ. Тус их сургууль дээр Байгаль орчны чиглэлээр үйл ажиллагаа явуулдаг "Миний клуб" нэртэй сайн дурын нэгдэл ажилладаг. Клубийн гишүүд төслийн нэгжид ирж Байгаль орчны чиглэлээр юу хийж байгааг сонирхож, мод шилжүүлэн суулгах ажилд зуны амралтаараа оролцон хамтран ажиллах саналаа илэрхийлэв. Төслийн нэгжийн захирал Д.Одхүү уг төслийг Байгаль орчинд ээлтэй төсөл болох талаар танилцуулж, тэдний саналыг бүх талаар дэмжихээ илэрхийлэв.

АРХЕОЛОГИЙН ЭРДЭМТЭДТЭЙ УУЛЗАВ

Монголын Шинжлэх ухааны Академийн Археологийн Хүрээлэнгийн Эрдэмтэн нарийн бичгийн дарга Н.Гүнчинсүрэн тэргүүтэй археологийн эрдэмтэд Эгийн голын УЦС-ын төслийн нэгж дээр ажлын уулзалт хийв. Эрдэмтэд Усан цахилгаан станцын бүсэд хийсэн 1992-2002 оны Археологийн судалгааг, мөн ирэх 4 жилд хийх ажлаа танилцуулав. Төслийн нэгжийн талаас судалгааны ажлыг хугацаа хожих үүднээс олон багийг зэрэг ажиллуулах, Шинжлэх ухаан технологийн их сургууль болон дээд сургуулиудыг хамран оруулах санал гаргаж судалж үзэхээр боллоо. Мөн олдсон зүйлээр орон нутагт музей байгуулах санал гаргав. Эгийн голын УЦС-ын далан болон усан сан бий болох 900 орчим хуучны олдвор илрүүлэн судалж байна.

                                                                  

Холбоо барих

  • +976 7711 11 50
  • contact@eghpp.mn
 

Манай хаяг

Баянзүрх дүүрэг 26-р хороо Олимпийн гудамж Энканто Таун 3 дугаар давхарт Улаанбаатар хот Монгол Улс

Сошиал медиа